Kepler to Müller, 2 September 1630
Johannes Kepler, “Kepler to Müller, 2 September 1630,” Nova Kepleriana 4, September 2, 1630, 78–79, transcribed in Plain Old Text, https://sources.vjbe.net/stable/kve91.
Nova Kepleriana 4 2 Sep, 1630, p. 78–79 Summary
Part of Die Keplerbriefe auf der Nationalbibliothek und auf der Sternwarte in Paris
Kepler sends Friedrich Bartsch to see to the sale of the *Ephemerides* and defends giving Wallenstein his title as Duke of Mecklenburg in the dedication. His last letter to Müller; he died at Regensburg two months later.
Source: Johannes Kepler's letter to Philipp Müller written at Lauban on 2 September 1630, sent with Friedrich Bartsch to see to the sale of the Ephemerides, and defending the title he had given Wallenstein, as Duke of Mecklenburg, in their dedication. It is the last of Kepler's letters to Müller in the collection; Kepler died at Regensburg two months later. The original is lost; the copy is in the Bibliothèque de l'Observatoire, Paris (B, 1, 9 (89); 89, 8. L). First printed in Nova Kepleriana 4, ed. Walther von Dyck and Max Caspar, Abhandlungen der Bayerischen Akademie der Wissenschaften, Math.-naturw. Abteilung 31, no. 1 (Munich, 1927), 78–79.
Transcribed from: the page images of the 1927 printing.
Only the letter is given; the editors’ German summary and notes are left out.
S. P. D.
Clarissime excellentissimeque vir, D. amice benevolentissime.
Spero literas ante dies 6 Torgam missas cum exemplarium Ephemeridum sarcinis Lipsiam perlatas, tibique redditas. Iis curandis Francofurti (sive Lipsiae restiterint, sive jam praemissa Francofurtum sint) submitto hunc generi mei fratrem Friedericum Bartschium. Ei rogo etiam atque etiam consilia tua et super insertione in catalogum et super distractione suppedites. Quae etsi ipsum non obligabunt, ut mandatis meis, quae oretenus accepit, deroget; non poterunt tamen non admonere ipsum de multis, quae forsan ex se ipso non deprompsisset. Praeterea instruxi ipsum viatico tenuissimo, praecipue ob pericula itinerum praesentia. Pauca adjeci, quae a cive vestro Sebast. Mejero, jubente per schedam cambiariam cive nostro Paulo Werner peteret. Et si metus plane nullus est, ne scheda haec ipsum frustretur; si tamen inopinati quid incideret, ut est praesens rerum status: rogo Cl. Ex. Tua ipsi petenti, quae necessitas itineris postulaverit, qua Lipsiae, pecunia praesenti, qua Francofurti, per cambium, cum hominum illic usum nullum habeat adhuc dum, suppeditet, ejusque quod dederit refusionem a me sine mora expectet. Dedi ei reliquos 4 annos partis tertiae Ephemeridum cum titulo, ut habeas eam integram. Titulum patroni mei excusabis veris causis: quae Caesar Electoribus et Cancellariae imperii dictat, quae Patronus meus et literis et mandatis et numismatibus de se profitetur, quae subditi Principum Mechelb. acceptarunt, ea mihi nefas fuit infringere. Nec conductus sum propalator tituli, sed cum necessario esset scribenda Principi dedicatio, non potuit ea scribere nisi solenni titulo. Nec hic a me usurpatus titulus ejecit priores principes suis sedibus, nec cujusque impediet fortunam; potestque concedi surrogationis seu substitutionis beneficio sine etiam injuria eorum, qui priora habent jura; et nisi saeviunt atrocius irritata fata, potest pax coalescere, manente nobis titulo, restituta suis dominis provincia. Ego dudum Saxonis filium, nunc Caesaris filium salutassem Episcopos Magdeburgenses et Halberstatenses, si quid habuissem scribendum ad ipsos. Vale, nunciosque rerum laetarum, si Lipsiae vili pretio prostant, mihi quoque transmitte.
Laubani, 2. Sept. anno 1630.
Caetera ex latore.
Cl. Ex. T.
officiose colens
J. Kepler
Mathematicus.
Clarissimo excellentissimoque Viro D.
Philippo Millero, Medicinae Licentiato,
inclytae Academiae Lipsiensis Professori
Philosophico D. amico meo colendo
Leipzig.