Kepler to Müller, 4 January 1630
Johannes Kepler, “Kepler to Müller, 4 January 1630,” Nova Kepleriana 4, January 4, 1630, 70–71, transcribed in Plain Old Text, https://sources.vjbe.net/stable/6nfh1.
Nova Kepleriana 4 4 Jan, 1630, p. 70–71 Summary
Part of Die Keplerbriefe auf der Nationalbibliothek und auf der Sternwarte in Paris
Kepler hopes the type and paper are ready at Leipzig and arranges carriage to Sagan, reports what he has heard of Bartsch at Strasbourg, and settles the accounts, resolved to go on printing whatever happens.
Source: Johannes Kepler's letter to Philipp Müller written at Sagan on 4 January 1630, about the type and paper ordered at Leipzig for printing Tycho Brahe's observations, and the money held for him and Jacob Bartsch. The original is lost; the copy is in the Bibliothèque de l'Observatoire, Paris (B, 1, 9 (89); 89, 8. M). First printed in Nova Kepleriana 4, ed. Walther von Dyck and Max Caspar, Abhandlungen der Bayerischen Akademie der Wissenschaften, Math.-naturw. Abteilung 31, no. 1 (Munich, 1927), 70–71.
Transcribed from: the page images of the 1927 printing.
Only the letter is given; the editors’ German summary and notes are left out. Kepler’s marginal note, which the 1927 edition prints as a footnote, is given as a footnote. Fractional dates (7/17, old and new style) are written with a slash.
S. P. et foelicissimi
ineuntis anni omina.
Clarissime Excellentissimeque Vir, D. amice veteri fide.
Etsi ad duas meas epistolas nihil ego ad hanc usque diem abs Ex. T. accepi responsi (haeret enim fasciculus ad me spectans Görlicii jam per 14 dies, absente quippe, qui eas curaturus, cista sua conclusit),1 spe tamen plenus sum, et perlatas meas ad te (praesertim priores, Torgae a nostro Saganensi latore Halberstadium eunte traditas Tabellario Lipsensi noto, cum Angelio) et te, qua es aequanimitate, sic tecum statuere, unum quodlibet genus et animantum et hominum a sui generis aliis, qua re et me Astronomiae cultorem abs te ejusdem professore publico, opem, in excudendis praesertim Observationibus Brahei expectare debere. Si me non fallit spes mea, nec in uno nec in altero: sequitur, ut credam, typos Ciceroniano antiquo charactere jam fusos et perfectos esse; papyri etiam tres moles a papyrario vestro vicino jam confectas Lipsiamque advectas esse. Egi igitur cum nostratibus mercatoribus et aurigis Saganensibus; ut quicquid erit sarcinarum ad me spectantium, id tuo indicio a fusore et papyrario in currus et plaustra sua recipiant. Si fusori jam satisfecisti de meis Bartschianisve pecuniis, sperabo typos ad praescriptum perfectos futuros. Sin autem aequo animo patitur fusor neque tibi molestia nascetur: velim sane prius recognoscere mercem, quam pretium condictum ipse universum recipiat. Poterit enim te sponsore mercem facile et sine periculo e sua potestate emittere; praesertim si diligentiae adhibitae et observatae praescriptionis sibi erit conscius. Tu vero in damno nequaquam esse debes: quicquid enim vel erogasti vel promittes: de meis et Bartschianis pecuniis, sine nostra contradictione defalcabis.
De Bartschio hoc unum habemus ex relatu studiosi Laubanensis, Argentorato domum reversi: illum 7/17. Novembris Argentoratum pervenisse, die vero 13/23 quo nuncius hujus rei Argentorato discessit, ab urbe abfuisse, Durlacum profectum. Quid ille tibi dederit in mandatis de suis pecuniis, mihi est incompertum. Non puto, per Lipsiam esse reversurum. Itaque si nulla habes contraria mandata, decerpe etiam de eo, quod ille meis pecuniis superaddidit, quantum opus erit. Sin aliter est: mercator Hofcunz paratus est exsolvere, quantum mihi insuper erit necesse. Summa meae pecuniae erat, ni fallor, 76 Joachimici; de qua retines nunc non totos 23: quibus pro typis addendi 10 vel quod minus poteris; tum jam tribus ballis papyri conductae, et pro duabus aliis vulgaris impressoriae, quas rogavi Avianum ut coëmeret. Alea jacta est: quicquid fiat in publicis, pergendum mihi est in perficiendis inceptis: omnino typi conducti requiruntur ad perfectionem: ut, si etiam discedendum Sagano fuerit, integra potius relinquam, quam mutila et disjecta. Caetera scripsi ad D. M. Avianum, rogo D. Tua cum illo communicet. Et jam vale.
Sagani 4. Januarii anno 1630.
Cl. Ex. T.
officiis devotus
J. Keppler
Mathematicus.
Clarissimo Excellentissimoque viro D.
Philippo Millero, Medicinae Licentiato,
Astronomiae Professori in Academia
Lipsiaca, D. amico benevolentissimo
Leipzig.
In abweßen Herrn
M. Wilhelm Aviano
zu erbrechen.
[Margin:] Cum inclusa quitantia pro 53 Thaleris imp. ut petiisti.↩︎